ಸುಮ್ಮನೆ ಮಾತೇಕೆ

ಮುಂಗಾರಿನ ಮಳೆಯ ಮುದಕೆ

ಇಳೆಯ ಬೇಗೆ ಕಳೆದು ಹಸಿರುಟ್ಟಂತೆ

ಮೌನವೇ ಮನಕೆ ಹರುಷ ನೀಡುವಂತೆ

ಕಥೆ ಹೇಳುವಾಗ ಸುಮ್ಮನೆ ಮಾತೇಕೆ

ನಿನ್ನ ಜೊತೆ ನಡೆವಾಗ ದಾರಿಯಲಿ

ತಂಗಾಳಿ ಇರದಿದ್ದರೂ ಏನೋ ಮೈಚಳಿ

ಹಾಯಾದ ಅನುಭವವೊಂದು ಹೃದಯದಲಿ

ಮನೆಮಾಡಿದಂತೆ ನೀನಿದ್ದರೆ ಬಳಿಯಲಿ

ನೀನು ನನಗೆ ಮಾತ್ರ ಎಂಬ ಆಸೆ ಸ್ವಲ್ಪ ಅತಿಶಯ

ನಿನಗೂಂಟೆ ನನ್ನೀ ಹುಚ್ಚು ಕಲ್ಪನೆಯ ಪರಿಚಯ

ಕಣ್ಣುಗಳು ಕಲೆತು ಮಾತನಾಡುವಾಗ ಪ್ರೀತಿ ವಿಷಯ

ಎದೆಯಲಿ ಏನೋ ತಳಮಳ ಕೈಜಾರುವಾಗ ಸಮಯ

ನೀ ನಗುತಿರೇ ನೋಡಲು ನೂರು ಕಣ್ಣು ಸಾಲದು

ಕಿವಿಯಲಿ ಪಿಸುಗುಡುತ ಹೇಳಲೇ ಸಣ್ಣ ಗುಟ್ಟೊಂದು

ನನ್ನ ಪ್ರೀತಿ ನಿನಗೆ ಮಾತ್ರ ಮೀಸಲು ಎಂದೆಂದೂ

ಕನಸಲೂ ನೀ ಸ್ವಲ್ಪ ದೂರಾದರೆ ಸಹಿಸಲು ಆಗದು

ಮೂಕವಿಸ್ಮಿತ

ನಿನ್ನ ಪ್ರೀತಿ ನನಗೆ ಅಚ್ಚರಿಯ ಎಂಟನೆ ಅದ್ಭುತ

ನಿನ್ನ ಸುಂದರ ಚಂದಿರ ಮೊಗವ ನೋಡುತ

ಮಾತು ಮರೆತು ನಾನಾದೆ ಮೂಕವಿಸ್ಮಿತ

ಮನಸುಗಳು ಕಲೆತಿವೆ ಕಣ್ಣಲ್ಲೇ ಮಾತನಾಡುತ

ಕೈ ಬೆರಳುಗಳು ಒಂದನೊಂದು ತಾಕಿ

ನಾ ನಿನ್ನ ನೋಡುತಿರಲು ಕದ್ದು ಇಣುಕಿ

ನೀ ನಸುನಗಲು ನನ್ನ ಕಂಡು ನಾಚಿ

ತಬ್ಬುವಾಸೆ ಎರಡು ತೋಳಲು ಬಾಚಿ

ನೀ ನಗುತಿರಲು ತಾರೆ ಮಿನುಗುವಂತೆ

ಮನಸು ಹೊಸ ಹಾಡನು ಗುನುಗುತಿದೆ

ನೀ ನುಡಿಯುತಿರಲು ಸ್ವಾತಿಮುತ್ತಂತೆ

ಕನಸೂ ಕೂಡ ನಿನ್ನ ಸನಿಹವೇ ಬಯಸಿದೆ

ಜಗದ ಎಲ್ಲಾ ಖುಷಿಯ ನಿನಗೆ ನೀಡಿ

ಹೆಜ್ಜೆ ಹಾಕುತಿರಲು ನಿನ್ನ ಜೊತೆಗೂಡಿ

ಆ ದೇವರಲಿ ಕೇಳುವೆನು ಕೈಮುಗಿದು ಬೇಡಿ

ಇರುವಂತೆ ಮಾಡು ನಾವೆಂದೂ ಹೀಗೆ ಕೂಡಿ

ಸಂಗಮ

ರವಿ ಮುಳುಗುವ ತಿಳಿಗಾಳಿಯ ಸಮಯ

ಆ ಸವಿಸಂಜೆಗೆ ತಲೆದೂಗಿತು ಹೃದಯ

ಬಾನಲಿ ನಲಿಯುತ ಹಾರುವ ಹಕ್ಕಿಗಳ ನೋಡಿ

ಮನಸು ಗರಿಬಿಚ್ಚಿ ಕುಣಿಯಿತು ಅವುಗಳ ಕೂಡಿ

ಸಾಗರದ ಅಲೆಗಳು ಸ್ಪರ್ಶಿಸುತಿರಲು ಪಾದವ

ಕಾಣದೊಂದು ಶಕ್ತಿ ತನ್ನೆಡೆ ಸೆಳೆದಂತ ಅನುಭವ

ಪ್ರತಿ ಬೇಟಿಯಲು ತೀರದ ಹಳೆ ನೆನಪು ಅಳಿಸುವ ಅಲೆ

ನನಗೂ ಕಲಿಸಿಕೊಡಬಾರದೇಕೆ ಈ ನಿನ್ನ ವಿನೂತನ ಕಲೆ

ದೂರ ತೀರದಲಿ ಬಾನು ಕಡಲುಗಳ ಸಂಗಮ

ನೇರ ಹೃದಯವ ತಟ್ಟಿತು ಆ ಮಧುರ ಪ್ರೇಮ

ದೇವರ ಈ ಸುಂದರ ಸೃಷ್ಟಿಗೆ ಸೋತು ಮನ

ಸೃಷ್ಟಿಕರ್ತನಿಗೆ ಹೇಳಿತು ಸಾವಿರ ನಮನ

ಒಂಟಿ ಹೃದಯವು ನಿಸರ್ಗದ ಸಿರಿಗೆ ಸೋತು

ಜಂಟಿಯಾಗ ಬಯಸಿದೆ ಪ್ರಕೃತಿಯಲಿ ಬೆರೆತು

ಏಕಾಂಗಿ ಮನವು ಜೊತೆಗಾಗಿ ಪ್ರೀತಿಯೊಂದ ಕೇಳಲು

ಎಚ್ಚೆತ್ತುಕೊಂಡಿತು ಮನ ಮತ್ತೊಂದು ಅಲೆ ಬಂದು ತಟ್ಟಲು