ಸಂಗಮ

ರವಿ ಮುಳುಗುವ ತಿಳಿಗಾಳಿಯ ಸಮಯ

ಆ ಸವಿಸಂಜೆಗೆ ತಲೆದೂಗಿತು ಹೃದಯ

ಬಾನಲಿ ನಲಿಯುತ ಹಾರುವ ಹಕ್ಕಿಗಳ ನೋಡಿ

ಮನಸು ಗರಿಬಿಚ್ಚಿ ಕುಣಿಯಿತು ಅವುಗಳ ಕೂಡಿ

ಸಾಗರದ ಅಲೆಗಳು ಸ್ಪರ್ಶಿಸುತಿರಲು ಪಾದವ

ಕಾಣದೊಂದು ಶಕ್ತಿ ತನ್ನೆಡೆ ಸೆಳೆದಂತ ಅನುಭವ

ಪ್ರತಿ ಬೇಟಿಯಲು ತೀರದ ಹಳೆ ನೆನಪು ಅಳಿಸುವ ಅಲೆ

ನನಗೂ ಕಲಿಸಿಕೊಡಬಾರದೇಕೆ ಈ ನಿನ್ನ ವಿನೂತನ ಕಲೆ

ದೂರ ತೀರದಲಿ ಬಾನು ಕಡಲುಗಳ ಸಂಗಮ

ನೇರ ಹೃದಯವ ತಟ್ಟಿತು ಆ ಮಧುರ ಪ್ರೇಮ

ದೇವರ ಈ ಸುಂದರ ಸೃಷ್ಟಿಗೆ ಸೋತು ಮನ

ಸೃಷ್ಟಿಕರ್ತನಿಗೆ ಹೇಳಿತು ಸಾವಿರ ನಮನ

ಒಂಟಿ ಹೃದಯವು ನಿಸರ್ಗದ ಸಿರಿಗೆ ಸೋತು

ಜಂಟಿಯಾಗ ಬಯಸಿದೆ ಪ್ರಕೃತಿಯಲಿ ಬೆರೆತು

ಏಕಾಂಗಿ ಮನವು ಜೊತೆಗಾಗಿ ಪ್ರೀತಿಯೊಂದ ಕೇಳಲು

ಎಚ್ಚೆತ್ತುಕೊಂಡಿತು ಮನ ಮತ್ತೊಂದು ಅಲೆ ಬಂದು ತಟ್ಟಲು