ದೀಕ್ಷೆಯ ತೊಡು ಇಂದೇ - ಕುವೆಂಪು

ದೀಕ್ಷೆಯ ತೊಡು ಇಂದೇ
ಕಂಕಣ ಕಟ್ಟಿಂದೇ
ಕನ್ನಡ ನಾಡೊಂದೇ
ಇನ್ನೆಂದೂ ತಾನೊಂದೇ

ನೃಪತುಂಗನ ದೊರೆಮುಡಿ ಸಾಕ್ಷಿ
ಪಂಪನ ಪದ ಧೂಳಿಯ ಸಾಕ್ಷಿ
ಕೂಡಲ ಸಂಗನ ಅಡಿ ಸಾಕ್ಷಿ
ಗದುಗಿನ ಕವಿದೇವನ ಸಾಕ್ಷಿ

ಇಡು ಸಹ್ಯಾದ್ರಿಯ ಮೇಲಾಣೆ
ಇಡು ಕಾವೇರಿಯ ಮೇಲಾಣೆ
ಇಡು ಚಾಮುಂಡಿಯ ಮೇಲಾಣೆ
ಇಡು ಗೊಮ್ಮಟ ಗುರುದೇವಾಣೆ

ಕಾಣಲಿ ಕನ್ನಡ ವ್ಯೋಮಾಕ್ಷಿ
ನಿಲ್ಲಲಿ ರವಿ ಚಂದ್ರರ ಸಾಕ್ಷಿ
ಕೇಳಲಿ ಕನ್ನಡ ಪಶು ಪಕ್ಷಿ
ಸರ್ವ ದೇವರೂ ಶ್ರೀ ಸಾಕ್ಷಿ

ಇಡು ನಿನ್ನಯ ಸತಿಯಾಣೆ
ಇಡು ನಿನ್ನಯ ಪತಿಯಾಣೆ
ಮಕ್ಕಳ ಮೇಲಾಣೆ
ಅಕ್ಕರೆ ಮೇಲಾಣೆ
ಗುರುದೇವರ ಆಣೆ
ನನ್ನಾಣೆ
ನಿನ್ನಾಣೆ
ತೊಡು ದೀಕ್ಷೆಯ
ಇಡು ರಕ್ಷೆಯ
- ಕುವೆಂಪು

ಕುಪ್ಪಳ್ಳಿ

ಚಲಿಸುವ ಮೋಡಗಳ ದಿಬ್ಬಣದಲಿ
ಕಾನನದ ಹಸಿರ ರಾಶಿ ಸಿರಿಯಲಿ
ತಂಪು ಸೂಸುವ ಗಾಳಿಯಲಿ
ಕಂಗೊಳಿಸುತಿದೆ ಕುಪ್ಪಳ್ಳಿ
ನಿನ್ನ ನೋಡಲು ಬರುವೆ ಮರಳಿ

ನಾಟಿ ಪೈರಿನ ನಾಟ್ಯದಲಿ
ಬೆಟ್ಟ-ಗುಡ್ಡಗಳ ಘಾಟಿಯಲಿ
ಕಲ್ಲನ್ನು ಕವಿಯಾಗಿಸುವ ಧಾಟಿಯಲಿ
ಕೆಣಕುತಿದೆ ಕುಪ್ಪಳ್ಳಿ
ನಿನ್ನ ನೋಡಲು ಬರುವೆ ಮರಳಿ

ಸೂರ್ಯ ಕಿರಣಗಳ ಹೊಳಪಿನಲಿ
ಹಾರೋ ಹಕ್ಕಿಗಳ ಚಿಲಿಪಿಲಿಯಲಿ
ಹರಿವ ಝರಿಯ ಬಳುಕಿನಲಿ
ಸೆಳೆಯುತಿದೆ ಕುಪ್ಪಳ್ಳಿ
ನಿನ್ನ ನೋಡಲು ಬರುವೆ ಮರಳಿ

ಸುರಿವ ಸೊನೆಯ ಸದ್ದಿನಲಿ
ಕೊರೆವ ಮಂಜಿನ ಇಬ್ಬನಿಯಲಿ
ಮಧುವಣಗಿತ್ತಿಯಂತೆ ಸಿಗ್ಗಿನಲಿ
ನಲಿಯುತಿದೆ ಕುಪ್ಪಳ್ಳಿ
ನಿನ್ನ ನೋಡಲು ಬರುವೆ ಮರಳಿ

ಕವಿಮನೆಯ ಸ್ಫೂರ್ತಿ ನೆಲೆಯಲಿ
ಸವಿಗಾನದ ಇಂಪಿನ ಅಲೆಯಲಿ
ಸಿಲುಕಿದೆ ನಾನು ಪ್ರೀತಿ ಸೆಲೆಯಲಿ
ಮನಸೋತು ಶರಣಾದೆ ಕುಪ್ಪಳ್ಳಿ
ನಿನ್ನ ನೋಡಲು ಬರುವೆ ಮರಳಿ

ಶಿಲೆಗಳೂ ನುಡಿಯುವ ಕವಿಶೈಲದಲಿ
ತನು-ಮನಗಳೆರಡು ಅರಳಿ
ಹೊಸ ಸೊಗಸೊಂದ ಕಂಡೆ ನಾನಿಲ್ಲಿ
ಹೇಗೆ ಮರೆಯಲಿ ನಿನ್ನ ಕುಪ್ಪಳ್ಳಿ
ನೋಡಲು ಬರುವೆ ನಿನ್ನ ಮರಳಿ ಮರಳಿ